Սկանդալ հայկական բջջային օպերատորի գլխավոր տնօրենի անձի շուրջ. պարզում ենք իրավիճակը

ԵՐԵՎԱՆ, 18 հոկտեմբերի./ԱՌԿԱ/. Սկանդալ է առաջացել Viva-MTS բջջային օպերատորի գլխավոր տնօրեն Ռալֆ Յիրիկյանի անձի շուրջ։

Սոցցանցերում հայտնվել են մեղադրանքներ նրա հասցեին պետական դավաճանություն կատարելու մեջ, ընկերությունից մեղադրանքները հերքել են։

Մեղադրանքներն ու սոցցանցերը

Սկանդալն առաջացել է ՀՀ վարչապետի աշխատակազմի գործերի նախկին կառավարիչ Գևորգ Աճեմյանի հայտարարությունների ֆոնին, ով, գտնվելով ԱՄՆ–ում, իր Facebook–յան էջում պարբերաբար հրապարակել է մեկնաբանություններ` մեղադրելով Viva-MTS ընկերության գլխավոր տնօրեն Ռալֆ Յիրիկյանին պետական դավաճանության մեջ։

Ավելի ուշ Աճեմյանն իր հրապարակումները փակել է` նշելով, որ ընկերությունից պաշտոնական նամակ է ստացել, որ պարոն Յիրիկյանը զբաղված է իր մասնագիտական գործով և իր ինֆորմացիան չի համապատասխանում իրականությանը։ Աճեմյանը նաև նշել է, որ սպասում է պաշտոնական էջով հերքմանը (որ պարոն Յիրիկյանը չի կանչվել ԱԱԾ որպես մեղադրյալ), որի չլինելու դեպքում նախորդ գրառումը կրկին կդարձնի հասանելի բոլորի համար։

Հարկ է նշել, որ Աճեմյանը հայտնի է նրանով, որ աշխատանքից ազատվել է 2018թ.–ի հուլիսին սոցցանցերում իր անվան շուրջ առաջացած սկանդալի պատճառով։ Հեռանալով ՀՀ վարչապետի աշխատակազմի գործերի կառավարչի պաշտոնից` նա հայտարարեց, որ դուրս է գալիս «Քաղաքացիական պայմանագիր» կուսակցությունից` մեղադրելով, որ կուսակցության ղեկավարությունը տոտալ դիկտատուրա է իրականացնում կուսակցության շարքային անդամների նկատմամբ Երևանի վարչական շրջաններից մեկի կողմից որպես պատգամավոր առաջադրվելու համար իր թեկնածությունը մերժելու պատճառով։

Բացի այդ, սոցցանցերում առաջացել է ևս մեկ սկանդալ Աճեմյանի շուրջ այն հայտարարությունից հետո, որ նա «Կյանքի խոսք» կրոնական կազմակերպության անդամ է։ ԶԼՄ–ներում նաև տեղեկություն հայտնվեց այն մասին, որ Աճեմյանը իր մոտ է հրավիրել «Աշտարակ Կաթ» ապրանքային նշանի սեփականատիրոջը և հորդորել կարճ ժամկետներում «Աշտարակ Կաթ» ապրանքային նշանը հետ վերադարձնել «Աշտարակ Կաթ» ՓԲԸ նախկին սեփականատիրոջը, ով ևս «Կյանքի խոսք» կրոնական կազմակերպության անդամ է։ Նա նաև հայտարարել է, որ ՀՀ առաջին նախագահ Լևոն Տեր-Պետրոսյանը «քոռ է ոչ միայն ֆիզիկապես, այլև քաղաքական հեռատեսությամբ», ինչը քննադատության մեծ ալիք էր բարձրացրել սոցցանցերում։

Պաշտոնական հերքում

Ռալֆ Յիրիկյանի հասցեին Աճեմյանի կողմից հնչած հայտարարություններին ի պատասխան` Viva-MTS ընկերությունը տարածել է պաշտոնական հերքում։

«Վիվա-ՄՏՍ-ը պաշտոնապես տեղեկացնում է, որ ընկերության գլխավոր տնօրեն Ռալֆ Յիրիկյանի՝ իրավապահ մարմինների կողմից բերման ենթարկվելու, քննության, իրավական որևիցե գործընթացում կամ գործում ներգրավվածության, առավել ևս հանցավոր արարքներում նրա մեղսակցության վերաբերյալ տեղեկություններն ամբողջությամբ կեղծ են, մտացածին և իրականությանը չհամապատասխանող», – ասվում է ընկերության հայտարարության մեջ։

Հայտարարության մեջ նաև նշվում է, որ հաշվի առնելով կապի ոլորտի ռազմավարական նշանակությունն առկա իրավիճակում և առհասարակ, կոչ ենք անում ՀՀ ազգային անվտանգության ծառայությանը, ՀՀ ոստիկանությանը և իրավապահ այլ մարմիններին ուշադրության ներքո պահել նման զրպարտանքի աղբյուրները և տարածողներին՝ դրանց իրական նպատակները բացահայտելու և ըստ անհրաժեշտության համարժեք իրավական միջոցներ ձեռնարկելու նպատակով:

Ընկերության մասին

Viva-MTS–ը («ՄՏՍ Հայաստան» ՓԲԸ) գործում է հայկական շուկայում 2005թ.–ին։ Ընկերության բաժնետոմսերի 100%–ի սեփականատերը «Մոբիլնիյե Տելեսիստեմի» (ՄՏՍ) ընկերությունն է, որը Ռուսաստանի և ԱՊՀ–ի բջջային կապի խոշորագույն օպերատորն է։–0–

Ծանոթացեք լուրերին առաջինն ու քննարկեք դրանք մեր Telegram-ում

21:40 18.10.2020